म पात्र हुँ!
जिबित रङ्गमन्चको एक पात्र
र मलाई
चाहानेले शिरमा सजाउने
पुज्नलाई देवीपनि बनाउने
नचाहनेले पुरुषत्व देखाउँदै
मेरा पत्र - पत्र केलाउने
र आफ्नो इच्छा अनुसार खेलाउने
जिन्दगी रङ्गमन्च, र नाटक एक!
म पात्र एउटै, तर भुमिका अनेक!
बिबादै बिबादका बिच
जन्माउने कि नजन्माउने भन्ने
गिराउने र किन नगिराउने भन्ने
म जन्मिन्छु चन्द्रमुखी
औसिं रुपि मन अरुको बनाएर
आफुबाट आफु जन्मिदा आफ्नै निरास
अरुका आसलाई खिल्ली उडाउदै
म कसरी हाँसु जिन्दगीभर
जन्मिदै दुखी अरुलाई बनाएर
फरक कथाहरु, तर बेदना एक!
म पात्र एउटै, तर भुमिका अनेक!
ठोकिन्छ नेल नाक कानमा
के बाला अनि के माला?
दासताका ति चिनारी
उनैको आयु बढाइदिने
न खोतलिन्छ इच्छा मनका
न पाइन्छ जिबनसाथी छान्न
उनको इज्जतको अग्निमा अहुती स्वरुप
अपरिचितकै डोलि चढाइदिने!
अपमान धेरै, तर सहने एक!
म पात्र एउटै, तर भुमिका अनेक!
एक चिम्टी सिन्दुरमा
यो सिउँदो रङ्गेला!
तर रङ्गिदैन मेरो जिन्दगी
लक्ष्मीरुपि आगमनले
समृद्धि उनको भब्य महलमा
तर उज्यालिदैन मेरो जिन्दगी
किनकी उनको अन्धविश्वासमा
म बोक्सी भैदिनु पर्ने
छौपडिमा सुति दिनु पर्ने
मोल मोलाइको छलफलमा
निरिह भएर उभिइदिनु पर्ने!
सस्तो माल ठहर भएमा
उनैका हात बाट जलिदिनु पर्ने!
जिन्दगी रङ्गमन्च, र नाटक एक!
म पात्र एउटै, तर कष्ट अनेक!
म पात्र हुँ!
जिबित रङ्गमन्चको एक पात्र
र उनको निर्देशनमा
कहिले गर्भबाटै गिराइने
जबर्जस्ती अर्कालाइ भिर्याइदिने
आफ्ना अक्षम्य पाप पखाल्न
मलाई देवीपनि बनाउने
देखाउनलाई सम्मान गरि सजाउने
र अन्धकारमा
मेरा अस्मिताका पत्र पत्र केलाउने
आफ्नो इच्छा अनुसार मलाई खेलाउने
जिन्दगी रङ्गमन्च, र नाटक एक!
म पात्र एउटै, तर भुमिका अनेक!
No comments:
Post a Comment